【國泰燃油附加費】國泰2024年9月1日起減YQ！短途每程平$46！長途每程平$204！
平時用里數換機票嚟講只係免到個「機票價格」，但係你仍然要俾錢係因為有「政府費用及稅」同埋「航空公司燃油附加費」。「政府費用及稅」好少會有變動，所以對里數換機票嘅朋友嚟講對價格最大影響嘅始終都係「航空公司燃油附加費」。呢兩樣收費對平時會搶平機票嘅朋友都有好大影響，因為你好多時明明見到航空公司話做緊$0、$1xx機票特價，但最後要俾幾百甚至成千蚊都係呢兩樣收費係到作怪。而國泰航空作為香港嘅主場航空，好多時其他航空公司都係跟國泰升跌，所以睇國泰個燃油附加費走勢基本上都可得知其他航空公司大概會係幾多。唔知燃油附加費係咩嚟同埋知道佢就嚟升/跌有咩可以做？睇埋以下文章啦！
2024年9月1日起國泰航空收取之燃油附加費
國泰個網有的難睇，總體燃油附加費如下:
- 短途(如日本,台灣,泰國): HK$207(由2024年8月1日至8月31日為止)；HK$161(由2024年9月1日起)
- 長途(如歐洲,澳洲,美國): HK$923(由2024年8月1日至8月31日為止)；HK$719(由2024年9月1日起)
- 簡單嚟講即係短途平咗$46，長途平咗$204
- 以上價格皆為由香港始發的航線，即係你張機票係來回咁買，第一程出發地喺香港就係咁收費。如果你係喺其他地方始發、或者你係單程咁換機票，就可以click返官網條link，睇下你喺由邊到出發而定。
國泰官網→https://www.cathaypacific.com/cx/zh_HK/prepare-trip/travel-advisories/fuel-surcharge-updates.html
燃油附加費係咩嚟？
燃油附加費，簡稱“YQ” ，你買機票時打開個價錢breakdown可以係tax/surcharge裡面睇到。美其名為航空公司可以用YQ嚟反映油價變動而對經營成本嘅影響，由YQ反映嘅價格變動係行政處理上會方便咗，但留意YQ對消費者，特別係里數換機票嘅朋友嘅換機票成本有直接影響。香港出發航班由2016年2月起唔俾收，民航處公布2018年11月起放寬可以再收返。
上圖為來回東京收取之燃油附加費(短途)
燃油附加費係點樣收取？長途及短途之分別？
各航空公司會就著所有航班及票種，分為短途及長途航線向乘客徵收客運燃油附加費。價錢係以每程計算，包括小童及嬰兒票。Econ同Business收取嘅價錢會一樣，長途就會比短途貴。
- 短途航班指指由香港出發往來香港 (HKG) 及亞洲地區之航班，包括日本,韓國,台灣,越南,中國,馬尼拉,金邊,泰國,檳城,吉隆坡,新加坡等地, 或者印尼峇厘，都會係當作短途。
- 長途航班指由香港出發往來香港 (HKG) 及西南太平洋地區、美洲、歐洲、中東、印度、非洲的航班，包括看似近啲但都當作長途嘅馬爾代夫,印度,斯里蘭卡,加德滿都。
- 如果以GCmap英哩距離計算，印尼峇厘會比加德滿都更遠，但因為燃油附加費係以區域計算所以峇厘當作短途會更加平。
- 燃油附加費係以每航段計算，即係當你需要轉機嘅時候，就要俾2次或以上嘅附加費。
於香港買機票顯示出嚟嘅價錢已經包括咗呢個燃油附加費，收幾多係由航空公司決定的。
上圖為馬爾代夫之燃油附加費(長途)
燃油附加費變動對於買機票嘅人有咩影響？
如果機票價格不變，而燃油附加費直接有增加或減少，消費者當然會直接受損(當YQ要加時)或者受惠(當YQ要減時)。如果你已經睇到下月會減的話，唔急嘅話可以等下月先買機票。
但長期嚟講，因為即使有燃油附加費的升跌但消費者做買機票的決定嘅時候都係會睇total price，同時各航空公司之間面對競爭，需要割價搶客時都係成個total price嚟減，所以又未必會對買機票好大影響。最實際都係睇返航空公司有無做特價機票優惠。
燃油附加費對於用里數換機票有咩影響？
對於里數換機票嘅人嚟講，燃油附加費當有增加或減少，個影響會比較直接，因為個Fuel Surcharge會直接加落個換機票成本到。好簡單嘅道理好似如果你2月份25,000里+$207+稅費 可以換到由香港出發到日本大阪來回機票，但係你3月份知道會加價，咁25,000里+$253+稅費 就可以換得到。呢個情況你就要係2月分換咗張機票先。反之亦然，所以對玩里數嘅朋友嚟講，燃油附加費嘅影響都幾大架。
燃油附加費於更改出發時間/重新出票/退票時會點？
- Re-booking : 可以理解為改時間 (same itinerary, same airline)，曾經飛過用過嘅票可以做re-booking，燃油附加費不會重新計算
- Re-issuance : 簡單啲睇，re-booking改唔到既就要用到re-issuance改，留意曾經飛過用過嘅票不可以re-issuance，燃油附加費會重新計算，所以出票時同重新出票時有變動會加/減，貴咗就補，平咗就退
- Refund : 成張票退返里數及稅金，留意曾經飛過用過嘅票不可以refund，所有航空公司燃油附加費都會退返
改票退票詳情可睇返→Asia Miles改機票/退票
結論: 知道燃油附加費會加/減應點做？
因為航空公司每月中左右都會更新燃油附加費，而收幾多燃油附加費係會以出票日起計
- 如果知道下月會減而你又唔係好趕要出票的話咪下個月先至出票
- 反之，如果知道下月會升，咁就嗱嗱聲好出咗張機票喇
國泰歷年燃油附加費參考 (單程)
| 日期 | 短途航班 | 長途航班 |
| 2024年9月1日起 | HK$161 | HK$719 |
| 2024年8月1日起 | HK$207 | HK$923 |
| 2024年7月1日起 | HK$161 | HK$719 |
| 2024年1月1日起 | HK$207 | HK$923 |
| 2023年10月1日起 | HK$253 | HK$1,127 |
| 2023年9月1日起 | HK$207 | HK$923 |
| 2023年6月1日起 | HK$161 | HK$719 |
| 2023年4月1日起 | HK$207 | HK$923 |
| 2023年3月1日起 | HK$253 | HK$1,127 |
| 2023年2月1日起 | HK$207 | HK$923 |
| 2022年11月1日起 | HK$253 | HK$1,127 |
| 2020年5月1日起 | 唔收 | |
| 2020年4月1日起 | HK$85 | HK$380 |
| 2020年3月1日起 | HK$116 | HK$516 |
| 2020年2月1日起 | HK$131 | HK$584 |
| 2020年1月1日起 | HK$116 | HK$516 |
| 2019年4月1日起 | HK$131 | HK$584 |
| 2019年2月1日起 | HK$100 | HK$448 |
| 2019年1月31日起 | HK$131 | HK$584 |
| 2018年11月1日起 | HK$146 | HK$652 |
| 2016年2月1日起 | 不可收取 | |
