國泰機票半價？！︱識買國泰機票有機會可慳成一半！教你自製機票優惠～日本泰國熱門航點都用到！
國泰機票半價？！識買國泰機票有機會可慳成一半！教你自製機票優惠～日本泰國熱門航點都用到！唔計廉航嘅話，唔少人飛個陣都會選擇搭國泰，航班時間唔錯又多選擇，坐商務／頭等又可以入lounge，但近年機票都唔平，如果講緊旺季去日本大阪／東京嘅話，一張機票上萬都唔奇，想買日本泰國平機票嘅話，就一定要睇埋落去啦～如果用渣打國泰萬事達卡訂機票仲可以賺埋回贈，咁就可以慳上加慳啦～
國泰機票平機票︱自製優惠機票方法
國泰機票平機票︱更改出發地✈️
玩法好簡單，其實就係將出發地由香港變做其他地方（以下例子為廣洲），咁樣就可以chok到平機票，以下例子用呢個方法搵來回東京嘅機票，結果甚至係平半價有多！
當然就咁睇機票的確係平咗好多，但你要考慮嘅嘢係：1）額外飛行時間、2）額外來回機場時間、3）額外來回機場交通費，以下有講埋去廣洲較方便嘅兩個出發點嘅交通時間同費用，大家可以參考吓～
香港來回東京為HK$9,987起
廣洲白雲機場來回東京為CNY3,387起。廣洲白雲機場(CAN)算係比較方便嘅出發地，由香港去廣洲白雲機場大概要3個鐘，花費HK$300-400左右。
琶洲港澳客運口岸來回東京為CNY2,312起。由香港去琶洲港澳客運口岸大概要1個半鐘，花費HK$250左右。國泰係會包埋船票俾你由廣洲返香港，再由香港去東京。
國泰機票平機票︱Multi-city✌🏻
用例子嚟講會比較易明：你想先去曼谷玩，返香港後過多排，再去東京玩
首先你要先自行買香港去曼谷嘅單程機票，再另外去買Multi-city嘅機票：曼谷＞香港，香港＞東京，東京＞曼谷（於香港轉機，可直接於香港航段離開）
用呢個方法搵3個航段嘅機票，價錢同就咁香港來回東京嘅機票相若，咁又可以慳返啲啦～
香港來回東京機票為HK$6,552
以Multi-city玩法，買3個航段，價錢為HK$6,431
國泰機票平機票︱常見問題
點先可以買到國泰日本泰國平機票？
- 主要其實都係更改出發點同玩Multi-city，詳情睇返內文啦～
邊啲航點適合用呢啲方法？
- 基本上香港人鐘意去嘅熱門航點，例如日本泰國等都用到，最好就自己再試吓㩒啦～