【曆月的意思？】信用卡回贈上限按曆月vs月結單週期？對信用卡回贈上限有乜影響？

尋日出咗個信用卡比較Pocket Card post俾大家一眼睇晒用邊張卡可以賺最多里數/現金回贈，見到反應都唔錯，首先係到多謝大家嘅支持。喺信用卡比較個表到我都有show埋每張卡嘅簽賬上限，等大家簽卡嘅時候心裡有數；而好多讀者都有問我簽賬上限入面嘅曆月係乜嚟？

特登寫做「曆月」係因為除了曆月，信用卡月結單週期月都可以叫做一個「月」，如無搞清楚的話兩者間個差異可以好大，對信用卡回贈都可以幾大影響。有見及此，特登喺到寫篇文俾大家，普及一下信用卡條款入面「曆月」嘅意思。

市面上多數信用卡講既每「月」上限或下限多數都以曆月嚟計，而比較要注意少少係AEON WAKUWAKU個6%網購回贈上限係以「月結單月」嚟計，仲有Citi PremierMiles個外幣簽賬HK$3/里要簽賬夠HK$20,000先會有，都係以「月結單月」嚟計。

曆月呢個字應該係作為金融業從業員時學返嚟，寫啲公開文件乜鬼都要define，要求寫清楚個definition，當時就好似學咗啲文件上定義部份要寫「月」就係指「曆月」。所以有朋友問我曆月嘅意思我都覺得是合理的，因為讀書時應該我同你都無學過。

---

曆月定義

市面上大部份信用卡對於額外回贈都設定咗上限，而個上限大部份都係以「曆月」嚟做計算單位。曆月，calendar month，照字面咁解釋係日曆上面嘅一個月，簡單嚟講即係每個月嘅1號至每個月嘅28/29/30/31號。譬如8月份嘅曆月，就係指8月1日至8月31日，如此類推。如果一張信用卡係以「曆月」嚟做額外回贈嘅計算單位，即係你8月1日同8月30日簽嘅簽賬，都係歸落8月嘅簽賬上限到。

例子：

用恒生MMPOWER卡簽賬：

網上簽賬：5%(基本0.4%)＋(額外4.6%)(每月額外回贈上限：HK$17,391)

• 7月30日網購：HK$16,000
• 8月1日網購：HK$7,000
• 8月30日網購：HK$11,000
• 9月3日網購：HK$11,000

如果你7-9月用恒生MMPOWER World Mastercard作以上簽賬，7月同9月因為無超到每月額外回贈上限，所以可以食足5%回贈。但係8月嘅簽賬因為過咗每月額外回贈上限：HK$17,391，所以淨係頭HK$17,391可以食5%回贈，尾數只能夠食到基本回贈0.4%。

總結：

• 7月額外回贈：HK$16,000 X 5% = $800+FUN Dollars
• 8月額外回贈：HK$17,391 X 5% + HK$609 X 0.4%= $802+FUN Dollars
• 9月額外回贈：HK$11,000 X 5% = $550+FUN Dollars

---

月結單周期月定義

上面講到市面上大部份信用卡對於額外回贈都係以「曆月」嚟做計算單位，但都有卡係以「結單」嚟做計算單位，譬如AEON WAKUWAKU就係咁。以「結單」嚟做計算單位就要睇返你張卡係幾時截數嘅，譬如AEON WAKUWAKU係每個月2號截數嘅，咁每個月3號至下一個月2號誌賬嘅簽賬就為之一個週期。

例子：

用AEON WAKUWAKU簽賬：

網上(海外及本地)簽賬6%現金回贈，每月結單回贈上限HK$300，簽HK$5,000就打爆。

• 7月1日網購，7月2日誌賬：HK$2,000
• 7月20日網購，7月22日誌賬：HK$3,000
• 8月1日網購，8月2日誌賬：HK$4,000
• 8月31日網購，9月3日誌賬：HK$1,000
• 9月19日網購，9月21日誌賬：HK$4,000

如果你7-9月用AEON WAKUWAKU作以上簽賬，7月月結單同9月月結單因為無超到每月額外回贈上限，所以可以食足6%回贈。但係8月月結單嘅簽賬因為過咗每月額外回贈上限：HK$5,000，所以淨係頭HK$5,000可以食6%回贈，尾數就無回贈了。

總結：

• 7月月結單額外回贈：HK$2,000 X 6% = HK$120
• 8月月結單額外回贈：HK$5,000 X 6% = HK$300
• 9月月結單額外回贈：HK$5,000 X 6% = HK$300

Citi PremierMiles外幣HK$3/里都係以月結單月計算

Citi PremierMiles信用卡於本地簽賬每港幣8元即可獲12積分(1里數)。當Citi PremierMiles持卡人於當月月結單内總認可 簽賬(包括本地及海外簽賬) 達到港幣 20,000 元或以上，該月月結單內的海外及網上外幣簽賬均可獲額外積分，每港幣3元 （或其外幣之等值）即可獲12積分(1里數)。若當月月結單内認可簽賬未能達到港幣 20,000 元，持卡人該月的海外及網上 外幣簽賬仍可以每港幣4元(或其外幣之等值) 即可獲12積分（1里數）。