【買勞力士】歐洲/海外買全新Rolex或二手錶攻略！海外大額簽賬用邊張信用卡好？

先前去咗瑞士，幫人買勞力士除咗俾我體驗咗係AD買Rolex嘅購物體驗，仲有碌卡瘋狂失敗嘅尷尬。本身諗住呢啲尷尬肉酸嘢就咪鬼寫出嚟，不過諗返呢啲都係個幾難忘嘅用卡經歷，相信都無幾何遇到，同大家分享可以汲取經驗，到你都有咁嘅信用卡海外簽賬大額機會時都可以睇下事先通知有無得避免到呢啲情況。

歐洲/海外買Rolex攻略

我個人近年有去過幾次歐洲，都有入下去AD到問下有無錶買，其實都唔算得係咩買錶攻略不過有少少心得分享下：

1. 唔好怕問，直接行入去同店員講你想買咩款色，例如GMT/Yacht Master/Explorer/Datejust或者Daytona都好，你照講，我未試過有熱門鋼錶款可以offer到俾我，但都幾多店舖會有少少貴金屬款色現貨可以俾你買走
2. 點搵AD? 去歐洲你可能會經過好多Cities/ Town，好似我啱啱去瑞士咁因為會去好多小鎮，咁到咗果到就直接去Google Map到打”Rolex”，咁就搵到邊間有得賣錶
3. 如果住5星酒店有concierge (禮賓服務)的話，試下問下佢有無啲Rolex Authorised Dealer connection，我就係Geneva Ritz Carlton幫我book到private appointment一入去就有人招呼有幾隻平時第到未必會賣既錶俾你買(貴金屬非熱炒款)

Rolex呢啲全球熱炒有價有時商品個個都知，所以都真係唔好諗住無需付出就俾你買得到熱門款，行多幾間問多幾次可能會有意外驚喜。

AD買勞力士，發生咩事？

1. 係瑞士Bucherer買錶，Bucherer已被Rolex收購算係Rolex嘅公司嚟，同時都係Rolex嘅Authorised Dealer (AD)，正經而有名氣嘅公司嚟，個銷售稅8%仲可以先免收，補返海關信就得。而我自己好少碌咁大額的交易
2. 交易失敗要碌嘅金額係CHF12,000，港幣約$104,000
3. 我用咗4間金融機構嘅卡去簽賬，包括係HSBC, 渣打, Amex, Citi，全部於第一次刷卡都失敗
4. 簽賬失敗後的3-4分鐘收到通知：

• • HSBC: 收SMS，叫我回覆Y/N確認返有無做條交易
  • 渣打: 先收SMS，叫我回覆1/2確認返有無做條交易，覆完之後過3分鐘再有個漫遊電話打嚟問我有無做交易
  • Amex: 先收SMS，叫我回覆1/2確認返有無做條交易，30秒內再收電話問我有無做交易
  • Citi: 於Citi App內彈出msg問我有無做交易

最後用咗HSBC信用卡+AE信用卡埋單

遇著4間金融機構都碌唔過，salesperson都行好幾次真是尷尬死我，都嚇親我唔知係咪乜卡都碌唔到俾唔到錢，咁多外幣信用卡本身我嘅盤算係打爆HSBC Visa Signature 個年度$10-$15萬最紅自主獎賞先，第二張就用渣打Smart卡慳返個外幣兌換手續費，之後先到AE卡同Citi…

點解AD買Rolex都無法交易？

其實有呢啲過唔到數嘅情況我諗係Bucherer呢啲商戶係銀行角度都係高風險，我自己估係好多賊去盗用信用卡最想都係變現，而名錶差不多相當於黃金，要變現容易，所以無啦啦碌十萬咁就出咗fraud alert。係有為我購物做成不便但總好過當有遺失盗用情況出現，突然唔見十幾萬我仲驚，保障卡主做嘅precaution 我是能理解的，不過都嚇親🥲

如果避免海外簽賬無法交易

1. 有海外大額要碌，想避免呢啲碌唔到嘅情況可能早啲打去通知咗銀行先。銀行唔知得唔得，不過Amex應該可以備注開通咗先
2. 去海外都要搵部電話/一機兩卡保留返張香港sim漫遊(照熄漫遊數據都收到SMS)，有呢啲突發情況或者要收OTP都仲可用得到
3. 佢部機碌完會叫你揀CHF 或 HKD嚟埋單，用HKD的話就有3%手續費仲要中咗DCC會無信用卡積分，一個唔小心撳錯掣就GG了。而用AE真係好，唔需要你揀直接用CHF，所以話唔識的話用AE其實好穩陣

分享係咁多，希望大家要海外shopping都順順利利🤣

十幾日歐洲，應該用咩信用卡做大額海外簽賬好？

首先避免用HKD做交易，一定要用當地貨幣埋單。唔好中咗DCC先否則講乜都無用

另外歐洲要避免用Dbs及Citi，因為呢2間銀行歐盟國簽賬唔計外幣仲有額外手續費

有渣打Smart的話我幾建議用，免1.95%外幣手續費好正

用HSBC Everymile的話要好清楚自己travel guru到咩level, 點樣玩先著數。一係就BoC cheers，每曆月外幣有HK$25000有4%回贈

更唔想諗就AE Explorer，無DCC，有3.75x積分都係相當好的選擇